SUKERTA TATA PALEMAHAN
Palet 1
Indik Karang, Tegal lan Carik
Pawos 30
(1) Krama Desa pangamong Karang Desa utawi Karang gunakaya patut ngawatesin karang inucap antuk tembok utawi pagehan mangde pakantenannya asri,
(2) Wates sisi kaler miwah kangin patut kakaryanin olih sang ngamong karang ayahan inucap, sane mawasta gagaleng kaluan, sajawaning tanah pacatu, tegal, carik utawi tanah padruwean ngaraga, sane kapiara wates sisi kelod miwah kauh utawi manut Dresta reh punika mawasta gagaleng kateben.
(3) Prade karasayang pagehan utawi turus inucap ngalikadin, yen pada arsa panyandinge, kengin watese nganggen pinget kewanten, kasaksinin olih Prajuru utawi Panglingsir Desa utawi pracihna pal saking sang ngawawenang,
(4) Prade wenten karang kabebeng utawi embet mangda kautsahayang wenten pamarginnya manut paigum lan pararem.
Pawos 31
(1) Sinalih tunggil Krama Desa utawi Banjar tan kalugra :
ha. Ngalah - alah Margi, Tegal ayahan Desa, Karang Desa lan Sapanugalannya
na. Ngalah - alah tanah linggih kahyangan, Tegak setra, lan sekancan linggih
c. sinanggeh Suci
(2) Prade wenten sekadi ring ajeng sang ngalalah wenang ngewaliang tanah inucap saha keni pamidanda manut pararem kadulurin upakara prade ngalah-alah tanah suci
(3) Sapasira ugi tan wenang ngadol karang Desa ; Nanging yan jagi wenten nyewadanayang lan sapanunggilannya, patut matur supeksa ring Prajuru Desa, yening mamurug keni pamidanda manut pararem.
Palet 2
Indik Papayonan
Pawos 32
(1) Ngawit nandur papayonan tanem tuwuh patut adepa agung (kalih satengah meter) ngajoroang sakeng wates, prade jantos ngaliwat wates wenang kasepat gantungin,
(2) Yening wenten tatanduran ngungkulin, samaliha mawastu mayanin kapisaga patut kawara antuk paiguman ping ajeng mangda praside sang nruwenang wit ngarebah utawi notor,
(3) Prade sampun kawara taler tan wenten utsaha sang nruwenang wit sang rumasa katetehan utawi kajerihan wenang masadok ring Prajuru, tur risampun kaparitatas kalugra mademang wit inucap, sakewanten patin papayonan patut katawur manut panglokika sane nepasin,
(4) Sang keni pamidanda panyangaskara saha prabeya manut pararam, arep ring wawangunan sang karubuhin, luwire :
ha. Sang nuwenang wit sinanggeh mayanin, prade pungkat ngarubuhin wawangunan krama tiyos,
na. Sang notor, munggul ütawi ngarebah taru tur ngarubuhin krama tiyos.
(5) Prade wenten wit mentik sajeroning wates patut kapademang, mangda tan ngranayang wicara. Prade sampun ageng kapademang, wit punika pinara tiga :
ha. Apah tiga katur ring sang nruwenang wit;
na. Apah tiga katur ring sang panyandingnya;
ca. Apah tiga katur ring Desa Adat.
(6) Krama Desa patut ngamanggehang kawerdian tanem tuwuh sane ngawinang Desane Asri tur lestari
Palet 3
Indik Wawangunan
Pawos 33
(1) Nyabran ngawangun patut
ha. Masadok ring Prajuru Desa, ping ajeng prade wawangunan nganinin wates;
na. Ngangge sukat asta bhumi miwah gagulat asta kosala-kosali, sanistane manut ring patitis niskala;
ca. Tan ngayubin ka pisaga;
ra. Tan dados ngembahang toya wit saking jempeng (WC) miwah balembeng utawi bada ka pisaga.
(2) Prade wawangunan jantos ngayubin bilih-bilih temboke ring telengin wates, ri sampun kawara tur kasadokang ring Prajuru Desa, wenang kadanda manut pararem, saha tembok inucap kagubar utawi sanistane mangda Kakaryaning abangan.
Palet 4
Indik Wawalungan
Pawos 34
(1) Warga Desa sane mamiara wawalungan patut sayaga nitenin negul utawi ngalogor mangda tan ngarusak karang utawi pabian krama sewos bilih-bilih jantos ngeranjing ngaletihin kahyangan.
(2) Prade wenten wawalungan malumbar utawi ngeleb ngarusak pakarangan utawi pabianan Krama siwos, risampun kawara dados kataban tur kadanda ngewaliang wit sane karusak saha nawur panebas papiaraan tatabanan, manut pangalokikan Prajuru Desa.
(3) Prade jantos ngaletehin linggih suci minakadi Pamrajan risampun Kaparitatas olih Prajuru Desa, wenang sang nruwenang kadanda mabuhu agung (caru eka sata, maduluran tebasan prayascita durmanggala), prade ngalatehin Kahyangan Desa utawi Pura Pamaksan, wenang nyarunin antuk Panca sata makereb itik belang kalung.
(4) Krama Desa patut nyanggra wewalungan miwah sarwa prani, tan kapatutang ngemademang utawi ngejuk paksi, nuba ulam miwah sane siwosan. Yan prade wenten melaksana sakadi punika keni pamidanda manut pararem tur kaaturang ring sang ngawewenang.
